شام کے شہر حلب میں بیرل بم حملے‘ بچوں سمیت 20 افراد ہلاک‘ 30 زخمی
حلب (ویب ڈیسک) شام کے شہر حلب میں بیرل بم حملے میں بیس افراد ہلاک جبکہ تیس شہری زخمی ہو گئے۔ ادھر دمشق کے مضافاتی علاقے دارایا سے لوگوں کا انخلا جاری ہے۔ تفصیلات کے مطابق شام کے شہر حلب میں باغیوں کے زیر کنٹرول علاقے میں بیرل بم حملے میں عام شہری نشانہ بنے۔ ہلاک ہونے والوں میں زیادہ تعداد بچوں کی ہے۔
عینی شاہدین کے مطابق بیرل بم حملے کے بعد کئی ایمبولینسیں جائے وقوعہ پر پہنچ گئیں۔ اسی دوران لوگوں کی ایک بڑی تعداد وہاں جمع تھی تو دوسرا بم حملہ ہو گیا۔
دوسری جانب حکومت اور باغیوں کے درمیان معاہدے اور حکومتی فورسز کے محاصرے کے خاتمے کے بعد دمشق کے مضافاتی علاقے دارایا سے لوگوں کا انخلا جاری ہے۔ باغیوں نے دارایا چھوڑنے سے قبل کئی عمارتوں کو آگ لگا کر تباہ کر دیا ہے۔
