سپریم کورٹ نے کراچی میں تجوری ہائٹس کو گرانے کا حکم دے دیا
اسلام آباد (92 نیوز) سپریم کورٹ نے کراچی میں نسلہ ٹاور کے بعد غیرقانونی طور پر تعمیر کی گئی عمارت تجوری ہائٹس کو بھی گرانے کا حکم دے دیا۔
بلڈر کے وکیل رضا ربانی نے کہا کہ ان کا موکل جگہ خالی کرنے کو تیار ہیں۔ الاٹیز سے معاملات حل کرنے اور اسٹرکچر منہدم کرنے کیلئے مہلت چاہئے۔ سپریم کورٹ نے بلڈر کو ریکارڈ اور دیگر سامان نکالنے کی اجازت دے دی۔
عدالت نے حکم دیا کہ کمشنر کراچی عمارت کے انہدام کی نگرانی کریں۔ ایک ماہ میں اسٹرکچر گرانے کا عمل مکمل کیا جائے۔ سپریم کورٹ نے حکم دیا کہ الاٹیز کو تین ماہ میں معاوضہ ادا کیا جائے۔ الاٹیز کو رقم واپس کرکے رپورٹ پیش کی جائے۔
عدالت نے کمشنر کراچی اور بلڈر کو اسٹرکچر منہدم کرکے رپورٹ پیش کرنے کی ہدایت کی ہے۔
