سندھ ہائیکورٹ نے پھانسی روکنے سے متعلق صولت مرزا کی درخواست مسترد کر دی، 12مئی کو تختہ دار پر لٹکایا جائے گا

کراچی (92نیوز) سندھ ہائیکورٹ نے صولت مرزا کی پھانسی روکنے سے متعلق درخواست مسترد کر دی ہے۔ ہائیکورٹ نے اپنے ریمارکس میں کہا کہ سپریم کورٹ کے فیصلے میں مداخلت نہیں کر سکتے، عدالت عظمیٰ نے سزا کو برقرار رکھا۔ اس موقع پر فاضل جج نے مزید کہا کہ 2004ءمیں بھی سزا کے خلاف صولت مرزا کی نظرثانی کی اپیل مسترد ہوئی ہے۔ بعدازاں صولت مرزا کی اہلیہ نے کہا کہ صرف ایک بندے کو لٹکانے سے بات نہیں بنے گی۔ انہوں نے کہا صولت مرزا کے ویڈیو بیان کو قانونی حیثیت دی جائے اور تحقیقات کے سلسلے میں سکاٹ لینڈ یارڈ کی ٹیم کی مدد لی جائے۔ واضح رہے کہ صولت مرزا کی پھانسی رکوانے کے خلاف درخواست مسترد ہونے کے بعد 12مئی کو پھانسی دی جائے گی۔