Thursday, March 28, 2024

سندھ میں راشن نہ ملنے پر عوام سڑکوں پر نکل آئے

سندھ میں راشن نہ ملنے پر عوام سڑکوں پر نکل آئے
April 16, 2020

کراچی ( 92 نیوز) لاک ڈاؤن نے دیہاڑی دار اور مزدور طبقے کو فاقوں پر مجبور کردیا ، سندھ  میں  راشن نہ ملنے پر لوگ سڑکوں پر نکل آئے اور حکومت سے فوری امداد کا مطالبہ کردیا۔

ایک طرف جان لیوا وائرس کورونا  ہے تو دوسری طرف بھوک سے جان کا خطرہ ہے ، غریب عوام کریں تو کیا، سندھ میں فاقوں سے تنگ  شہری سڑکوں پر آگئےاور احتجاج کیا۔

قمبرمیں راشن کی غیر منصفانہ تقسیم کے خلا ف جیالوں نے اپنی ہی حکومت کے خلاف دھرنا دے دیا  ،پیپلزپارٹی لیڈیز ونگ نصیر آباد کی صدر مسکان اوڈھانو کی قیادت میں مظاہرین  نے راشن فراہم نہ کرنے پر انڈس ہائی وے پر بھی دھرنے کی دھمکی دے دی۔

خیرپور میں بھی راشن نہ ملنے پر شہری بچوں اور خواتین سمیت احتجاج پر مجبور ہو گئے جن کا کہنا تھا کہ  لاک ڈاؤن کے باعث روز گار بند ہوگیا ،فاقوں پر مجبور ہیں، کورونا سے نہیں لیکن بھوک سے ضرور مریں گے۔

ادھر دادو کی تحصیل جوہی کی یونین کونسل شاہ حسن میں مستحق افراد کے ساتھ ایک اور فراڈ کا انکشاف  ہوا ہے ، غریبوں کےلیے آنے والا راشن غائب کردیاگیا ۔

یونین کونسل کی بنائی گئی فہرست میں 81افراد کو راشن فراہم نہیں کیا گیا،جس کے خلاف متاثرین نے مقامی ایم پی اے کے خلاف احتجاج کیا۔ مظاہرین کا کہنا تھا کہ مستحق افراد میں گھر گھر راشن تقسیم کرنے کے دعوے جھوٹے ثابت ہوئے ،لسٹ میں ہمارا نام دیا گیا راشن نہیں ملا۔