سندھ حکومت کا سترہ سال بعد افغان مہاجرین کی ازسرنو رجسٹریشن کرنے کا فیصلہ

 کراچی (92 نیوز) سندھ حکومت نے سترہ سال بعد افغان مہاجرین کی ازسرنو رجسٹریشن کرنے کا فیصلہ کر لیا۔ صوبائی محکمہ داخلہ نے متعلقہ اداروں اور وفاقی وزارتوں کے ساتھ افغانیوں کے معاملے پر خط وکتابت شروع کر دی۔

2003کے بعد سے سندھ میں مقیم افغان مہاجرین کی رجسٹریشن نہیں ہو سکی تھی۔ اسی وجہ سے کراچی سمیت سندھ بھر میں مقیم افغانیوں کا مستند ڈیٹا سندھ حکومت کے پاس موجود نہیں ہے۔

کئی برسوں سے غیرقانونی مقیم افغانیوں کے خلاف مروجہ قوانین کے تحت کارروائی بھی نہیں کی گئی ہے۔ اب محکمہ داخلہ سندھ نے متعلقہ اداروں اور وفاقی وزارتوں کے ساتھ افغانیوں کے معاملے پر خط وکتابت شروع کر دی ہے۔

سندھ میں 4 لاکھ سے زائد افغانی مقیم ہیں لیکن رجسٹریشن صرف 63 ہزار کی ہے۔ سندھ حکومت صوبے میں مقیم تمام افغانیوں کی رجسٹریشن کرئے گی۔ محکمہ داخلہ سندھ افغانیوں کی رجسٹریشن کے لیے طریقہ کار وضع کر رہا ہے۔