سندھ حکومت نے پاکستان اسٹیل ملز خریدنے میں دلچسپی ظاہر کردی

اسلام آباد (92نیوز) اسٹیل ملز خریدنے کیلئے صوبائی حکومت نے وفاقی حکومت سے باقاعدہ مذاکرات کے لیے دو رکنی کمیٹی قائم کر دی۔ تفصیلات کے مطابق سندھ حکومت نے پاکستان اسٹیل ملز کی خریداری کے لیے رضا مندی ظاہر کر دی ہے۔ سندھ حکومت نے نجکاری کمیشن کوخط کاجواب دے دیا ہے۔ ذرائع کا کہنا ہے کہ خط میں سندھ نے پاکستان اسٹیل ملز خریدنے کی خواہش ظاہر کی ہے۔ خط میں کہا گیا ہے کہ نجکاری کمیشن اسٹیل ملز کے معاملے پر صوبائی حکومت کے ساتھ سنجیدہ مذاکرات کا آغاز کرے۔ سندھ حکومت کے ساتھ اسٹیل ملز کی خریداری کا معاہدہ طے کیا جائے۔ حکومت سندھ نے وفاقی حکومت سے مذاکرات کے لیے دو رکنی کمیٹی قائم کردی ہے۔ کمیٹی میں وزیر خزانہ مراد علی شاہ اور سینیٹر سلیم مانڈوی والا شامل ہیں۔ خط میں کہا گیا ہے کہ وفاقی حکومت واضح کرے کہ وہ کن شرائط کے ساتھ پاکستان اسٹیل ملز سندھ حکومت کے حوالے کرنا چاہتی ہے۔ سندھ حکومت کا موقف ہے کہ پاکستان اسٹیل ملز قومی اثاثہ ہے جسے ذوالفقار علی بھٹو نے قائم کیا تھا۔ پاکستان اسٹیل ملز کی ری اسٹرکچرنگ سے اس کی پیداوار میں اضافہ کیا جاسکتا ہے۔ سندھ حکومت پاکستان اسٹیل ملز کی مکمل نجکاری کے خلاف ہے۔ اسٹیل ملز کے ملازمین کو بھی کسی صورت نوکریوں سے فارغ کرنے کے فیصلے کی حمایت نہیں کی جاسکتی۔ اس سے قبل وفاقی حکومت نے نجکاری کمیشن کے ذریعے سندھ کو پاکستان اسٹیل ملز کی خریداری کی پیشکش کی تھی۔ نجکاری کمیشن کی جانب سے لکھے گئے خط کے جواب میں سندھ حکومت نے پاکستان اسٹیل ملز کی خریداری کے لیے رضا مندی ظاہر کردی ہے۔