سمندری طوفان امفان بھارت اور بنگلہ دیش کے ساحلی علاقوں سے ٹکرا گیا
نئی دہلی ( 92 نیوز) خلیج بنگال میں بننے والا دہائی کا بدترین سمندری طوفان ’امفان‘ بھارت اور بنگلادیش کے ساحلی علاقوں سے ٹکرا گیا ، 160 کلو میٹر فی گھنٹہ کی رفتار سے چلتی طوفانی ہواؤں نے درختوں اور بجلی کے کھمبوں کو اکھاڑ پھینکا۔ مختلف حادثات میں 15 افراد ہلاک ہوگئے ۔ ایک شخص بنگلادیش،بھارت اور سری لنکا میں دو دو افرادبھارت میں12، سری لنکا میں2، اور ایک شخص بنگلادیش میں ہلاک ہوئے ۔
دہائی کا بدترین سمندری طوفان امفان بنگلادیش اور بھارت سے ٹکرا گیا ، سری لنکا میں بھی اثرات محسوس ہونے لگے ۔ امفان بھارتی ریاست مغربی بنگال کے قریبی جزیرے سے ٹکرایا تو 160 کلومیٹر فی گھنٹہ کی رفتار سے چلنےوالی طوفانی ہواؤں کے سامنے کوئی چیز نہ ٹھہر سکی ۔
ہواؤں کی رفتار کے سبب طوفان کو بحر اوقیانوس میں بننے والے کیٹیگری 2 کےطوفانوں سے تشبیہ دی جا رہی ہے ۔
طوفان کا مرکز کولکتہ کے جنوب میں ہے اور طوفان کےشہر سے ٹکرانے سے قبل ہی 100 کلومیٹر فی گھنٹہ کی تیز ہوائیں تباہی مچا رہی ہیں ۔
سمندر سے زمین کی طرف بڑھتے طوفان امفان کے باعث ساحلی علاقوں میں چار سے پانچ میٹر بلند لہریں دیکھی گئیں ، ساحلی مقامات پر تیز ہواؤں کے ساتھ بارش کا سلسلہ طوفان ٹکرانے سے قبل ہی شروع ہوچکا تھا۔
بنگلادیش میں کم و بیش بائیس لاکھ جبکہ بھارت میں تقریباً 5 لاکھ افراد کو محفوظ مقامات پر منتقل کیا جاچکا ہے ، اقوام متحدہ کے مطابق طوفان سے بھارت اور بنگلادیش میں اناسی لاکھ افراد متاثر ہوں گے۔