زمبابوے نے شیڈول کے مطابق دورے کی یقین دہانی کرادی:شہریارخان

لاہور(سپورٹس ڈیسک)پاکستان کے لیے اچھی خبر ،پاکستانی میدانوں میں  انٹرنیشنل  کرکٹ کا جلد آغاز ہو گا،زمبابوے کرکٹ بورڈ نے  شیڈول کے مطابق دورے کی یقین دہانی کرا دی،چیئرمین پی سی بی شہریار خان کا کہنا ہے زمبابوے بورڈ سے مسلسل رابطے میں ہیں۔ تفصیلات کے مطابق پاکستان کرکٹ بورڈ کے چیئرمین شہریار خان  نے قدافی سٹیڈیم میں میڈیا نمائندوں سے گفتگو کرتے ہوئے کہا کہ زمبابوے کرکٹ ٹیم کا دورہ پاکستان منسوخ نہیں ہوا ہے۔ اس سلسلے میں ہم مسلسل رابطے میں ہیں میرامتعدد مرتبہ زمبابوے کرکٹ بورڈ کے صدر سے ٹیلی فونک رابطہ ہوا جس میں انہوں نے پاکستان آنے کا پھر یقین دلایا ہے۔ شہریار خان نے کہا کہ زمبابوے بورڈ کو حکومت کی جانب سے کلیرنس مل گئی ہے۔  زمبابوے کرکٹ بورڈ نے آج حتمی فیصلے سے آگاہ کردیا ہے۔ پاکستان میں زمبابوے ٹیم کی سکیورٹی پر ایک ملین ڈالر خرچ ہوں گے اور زمبابوے کرکٹ ٹیم کو سٹیٹ پروٹوکول دیا جائے گا۔ زمبابوے دورہ پاکستان کے دوران قومی کرکٹ ٹیم کے خلاف تین ون ڈے اور دو ٹی ٹوئنٹی میچ کھیلے گی۔