کراچی میں تجاوزات کیخلاف آج آپریشن روکا تو کل قبضے ہو جائیں گے،سپریم کورٹ

کراچی ( 92 نیوز) سپریم کورٹ نے کراچی میں آپریشن  جاری رکھنے کاحکم دے دیا ۔ عدالت نے ریمارکس میں کہا کہ کراچی میں تجاوزات کےخلاف آپریشن نہیں رکے گا ، سیاسی وجوہات آڑے آجاتی ہیں ، آج روک دیا تو کل پھر قبضے ہوجائیں گے ، متاثرین کو متبادل جگہ دینے کا انتظام سندھ حکومت خود کرے ۔ سپریم کورٹ رجسٹری کراچی میں نظر ثانی درخواست پر چیف جسٹس نے ریماکس دیئے کہ گھر اور تجارتی جگہوں پر تجاوزات کو فی الحال نہ گرائیں، کل صبح تک میئرکراچی ، وفاق اور صوبائی حکومت پلان بنا کر لائیں ۔ سپریم کورٹ نے  کراچی میں تجاوزات کیخلاف کارروائی جاری رکھنے کی ہدایت  کرتے ہوئے   میئر کراچی کی کارکردگی کو سراہا ۔ چیف جسٹس نے میئر کراچی سے کہا کہ   آپ کو مکمل سپورٹ کریں گے ، اگر آج آپریشن روکا تو آئندہ نہیں ہوسکے گا ۔ جبکہ متاثرین کو متبادل جگہ فراہم کرنا سندھ حکومت کا کام ہے ۔ چیف جسٹس کا کہنا تھا کہ  میئر کراچی سیاسی کیریئر داؤ پر لگاکر کام کررہے ہیں ، لیکن سندھ حکومت کو میئر کی کارکردگی کا احساس نہیں ۔ چیف جسٹس کا کہنا تھا سپریم کورٹ نے امن و امان کی صورتحال کیسے خراب کرادی ، وفاقی حکومت کے کوارٹرز خالی کرانے کے حکم پر ہنگامے شروع ہوگئے ، کیا قبضہ مافیا کو ہنگاموں پر چھوڑ دیں،اگر آج روک دیا تو پھر قبضے ہوجائیں گے ۔ میئر کراچی نے کہا کہ گھروں کو گرانے کا اختیار نہیں اور آپریشن روکنے کا سوال ہی پیدا نہیں ہوتا ۔ میئر وسیم اختر کا کہنا تھا شہر کے تمام پارکس اور نالے کلیئر کروائے جائیں گے  ۔ ایڈووکیٹ جنرل سندھ نے کہا میئر کراچی بہت تیزی سے تجاوزات گرا رہے ہیں ، آپریشن 4 ہفتے کیلئے روکا جائے ۔ چیف جسٹس نے کہا کیا یہ ہے سندھ حکومت کی اپروچ  ، کیا سندھ حکومت قبضوں کو قانونی تحفظ دینے کا کہنا چاہتی ہے ؟۔عدالت نےسماعت کل تک ملتوی کردی۔