خیبرپختونخوا اسمبلی اجلاس میں اپوزیشن کا احتجاج ، ایجنڈے کی کاپیاں پھاڑ دیں

 پشاور (92 نیوز) ضم شدہ قبائلی اضلاع کے ممبران اسمبلی کو بولنے کا موقع نہ دینے پر خیبرپختونخوا اسمبلی میں اپوزیشن نے ہنگامہ کھڑا کر دیا۔  اراکین اسپیکر ڈائس کے سامنے جمع ہو گئے، ایجنڈے کی کاپیاں پھاڑیں اور نعرہ بازی کرتے رہے۔ خیبرپختونخوا اسمبلی کا اجلاس اس وقت ہنگامہ آرائی کی نذر ہو گیا جب قبائلی ضلع مہمند سے تعلق رکھنے والے ایم پی اے نثارمحمد کو بولنے کا موقع نہ دیا گیا۔ ہنگامہ آرائی کے دوران ایوان نے پناگاہوں اور محکمہ سیاحت کے حوالے سے دو بل منظور کر لئے۔ وزیر اطلاعات شوکت یوسفزئی نے اپوزیشن کے احتجاج پر تنقید کی۔ ان کا کہنا تھا کہ اپوزیشن نے ایجنڈے کی کاپی پھاڑی جس پر مقدس کلمات تحریر تھے۔ اس سے قبل ایوان نے کوئٹہ میں دھماکے کی شدید مذمت کی اور شہداء کے لئے فاتحہ خوانی کی۔