حب ندی میں ڈوبنے والے تمام افراد کی لاشیں نکال لی گئیں
کراچی ( 92 نیوز) بے احتیاطی پانچ زندگیوں کا چراغ گل کرگئی ،کراچی سے پکنک منانے حب ندی جانے والے ایک ہی خاندان کے 5 افراد ڈوب گئے ،ریسکیو ٹیموں نے تمام لاشیں نکال لی ہیں ۔
کراچی کے خاندان پر قیامت ٹوٹ پڑی ، اورنگی ضیاء کالونی کے بدقسمت خاندان کی حب ندی پر پکنک آخری ثابت ہوئی اور 5 افراد پانی کی نذر ہوگئے ، ڈوبنے والے 3 سال کے بچے اریب کی لاش آج صبح نکال لی گئی جبکہ 4 لاشیں گزشتہ روز نکالی گئی تھیں ۔
متاثرہ خاندان گزشتہ روز چھٹی کے دن تفریح کیلئے حب ندی گیا تھا جہاں 3 سال کا بچہ اریب ڈوب گیا ، جسے بچانے کی کوشش میں مزید 4 افراد پانی میں بہہ گئے ۔
شہریوں کا کہنا ہے تفریح مقامات پر لائف گارڈز اور ریسکیو اہلکاروں کی موجودگی یقینی بنائی جائے تاکہ ایسے سانحات سے بچا جاسکے ۔