جیکب آباد یو سی شیرواہ میں تنخواہ اور فنڈز کی سمری منظوری کی منتظر

ٹھل ( 92 نیوز) سندھ کے ضلع  جیکب آباد  کی یونین کونسل شیر واہ کے منتخب ارکان کی تنخواہ اور فنڈز کی سمری گزشتہ 4 سال سے منظور نہیں کی جاسکی  ، جس کے باعث فاقہ کشی پر مجبور ارکان کیلئے 2 وقت کی روٹی کا حصول امتحان بن گیا ۔ جیکب آباد کی یونین کونسل شیر واہ سندھ حکومت کی نظروں سے اوجھل  ، 4 سال سے ارکان کو تنخواہ ادا نہیں کی جاسکی ، کئی کونسل ارکان کے گھروں میں چولہے ٹھنڈے پڑگئے ۔ یونین کونسل کا رکن عبدالحمید بھی وزیراعلیٰ سندھ کی جانب سے سمری روکے جانے کے باعث تنخواہ سے  محروم ہے  ، فاکا کشی کا شکار عبدالحمید اپنے اور اہلخانہ کے 2 وقت کی روٹی کیلئے گاڑیاں دھونے والے سروس اسٹیشن پر کام کرنے پر مجبور ہے ۔ عبدالحمید کا کہنا ہے غریب ہونے کے باوجود عوام نے منتخب کیا تھا  ، لیکن حکام کی عدم توجہ کے باعث نہ تو تنخواہ ادا کی گئی اور نہ ہی ترقیاتی کاموں کیلئے فنڈز مل سکے ۔ یونین کونسل شیر واہ کے ارکان نے مطالبہ کیا ہے کہ سندھ سرکار منتخب نمائندوں کو نظرانداز کرنے کی بجائے فنڈز اور تنخواہیں جاری کرے ۔