جوہانسبرگ: زیرتعمیر پل گرنے سے دو افراد ہلاک، بیس زخمی، موٹروے پر پل کا ملبہ بکھرنے سے کئی گھنٹے تک ٹریفک جام

جوہانسبرگ (ویب ڈیسک) جنوبی افریقا میں زیرتعمیر پل گرنے سے دو افراد ہلاک جبکہ بیس افراد شدید زخمی ہو گئے۔ جوہانسبرگ کے مرکزی موٹروے پر زیرتعمیر پل اچانک زمین بوس ہو گیا۔ پل کا ملبہ ایک چھوٹی بس پر گرا جس کے نتیجے میں دو افراد جان سے ہاتھ دھو بیٹھے۔ زخمی ہونے والے افراد میں سے پانچ کی حالت تشویشناک ہے۔ متعدد افراد ملبے تلے دبے ہوئے ہیں جن کو نکالنے کی کوششیں کی جا رہی ہیں۔ پل گرنے کے وقت موٹروے پر ٹریفک کی روانی اپنے عروج پر تھی۔ پل کا ملبہ موٹر وے پر بکھرنے سے کئی گھنٹے ٹریفک جام رہی جس کے باعث شہریوں کو مشکلات کا سامنا کرنا پڑا۔