تیسرا ٹی 20،آسٹریلوی خواتین ٹیم نے پاکستانی ٹیم کو 9وکٹوں سے شکست دے دی
کوالالمپور( 92 نیوز)تیسرے ٹی 20 میں آسٹریلوی خواتین کرکٹ ٹیم نے پاکستان ٹیم کو 9 وکٹوں سے شکست دے دی ۔
پاکستانی خواتین ٹیم نے پہلے کھیلتے ہوئے مقررہ 20اوورز میں 8وکٹوں کے نقصان پر 97 رنز بنائے ۔ آسٹریلیا کی ٹیم نے صرف ایک وکٹ کے نقصان پر ہدف 10.2اوورز میں پورا کرلیا۔
پاکستانی کھلاڑی جم کر نہ کھیل پائیں اور ایک کے بعد ایک وکٹ گنواتی رہیں ۔ اوپنر ناہیدہ خان اور جویریہ خان 6،6رنز بنا کر ہمت ہار گئیں ۔ بسمہ معروف 34 اور عالیہ ریاض 17رنز بنا کر نمایاں رہیں ۔
پاکستانی ٹیم کی 6 کھلاڑی ڈبل فگر میں بھی داخل نہ ہو سکیں جبکہ 4 کھلاڑی رن آؤٹ ہوئیں ۔
آسٹریلیا کی ٹیم نے 98رنز کا ہدف صرف ایک وکٹ کے نقصان پر پورا کر لیا ۔ آسٹریلیا کی اوپنر الیسا ہیلے 67 رنز کے ساتھ ناقابل شکست رہیں ۔ بیتھ مونے نے 21رنز بنائے ۔