تھائی لینڈ ،زیرسمندرغار میں لاپتہ ہونیوالی فٹبال ٹیم کا سراغ مل گیا
تھائی لینڈ ( 92 نیوز) تھائی لینڈ کی زیرسمندر غار میں لاپتہ ہونے والی فٹبال ٹیم کا معجزانہ طور پر سراغ مل گیا ، 12 نوعمر لڑکے اور کوچ 9 روز بعد بھی زندہ سلامت ہیں ، فوجی حکام کے مطابق انھیں نکالنے میں مہینوں لگ سکتے ہیں۔
تھائی لینڈ میں 9 روز قبل لاپتہ ہونے والی انڈر سکس ٹین فٹبال ٹیم زندہ حالت میں مل گئی ، اس خبر نے جہاں لواحقین میں خوشی کی لہر دوڑائی، وہیں ان تک رسائی میں حائل مشکلات نے حکام کو پریشان کردیا ۔
فوجی حکام کے مطابق پانی اور گارے سے بھرے غار سے ٹیم کو نکالنے میں مہینوں لگ سکتے ہیں ، اس وقت انھیں کھانے پینے کی مستقل فراہمی اصل مسئلہ ہے ، بچوں کو باہر نکالنے کیلئے انھیں تیراکی سیکھانا ہوگی، تاہم سیلابی صورتحال میں یہ بھی خطرناک ہے ۔
تھائی نیوی سیل نے غار میں محصور بچوں کی ویڈیو بھی جاری کی ہے ، جس میں وہ پانی میں گھرے ایک خشک حصے میں دبکے ہوئے بیٹھے نظر آرہے ہیں ۔
فٹبال ٹیم مہم جوئی کیلئے23 جون کو تھام لوان نانگ نون نامی غاروں کے سلسلے میں آئی تھی ، جس کا منہ موسلادھار بارشوں کے بعد پانی بھرنے سے بند ہوگیا تھا ، ریسکیو آپریشن میں چین، آسٹریلیا، امریکا اور برطانیہ کے ماہر شامل تھے۔