ترکی کے صدارتی انتخابات میں طیب اردوان پھر فاتح ، ٹرن آؤٹ 87 فیصد رہا
استنبول ( 92 نیوز ) ترکی کے صدارتی انتخابات میں طیب اردوان کی فتح ہو گئی ، پارلیمانی الیکشن میں حکمران اتحاد پیپلز الائنس نے 54 فیصدسے زائد ووٹ لے کر واضح برتری حاصل کرلی ، ملک بھر میں ووٹنگ کا ٹرن آؤٹ 87 فیصد رہا ، شدید علیل شہریوں نے موبائل بیلٹ بکس سسٹم کے تحت گھر بیٹھے اپنا ووٹ کاسٹ کیا ۔
ملک پر حکمرانی کیلئے طیب اردوان سمیت 6 امیدوار مدمقابل تھے جب کہ پارلیمنٹ کی 600 نشستوں کیلئے 8 سیاسی پارٹیاں اکھاڑے میں اتریں ۔
ترک الیکشن کمیشن کے مطابق ملک بھر میں 5کروڑ 63 لاکھ 22ہزار 632 رجسٹرڈ ووٹرز تھے ، جن کیلئے ایک لاکھ 80 ہزار بیلٹ باکس رکھے گئے ۔
رواں الیکشن میں شدید بیمار افراد کیلئے موبائل بیلٹ بکس سسٹم متعارف کرایا گیا ، جس کے ذریعے 17 ہزار 258 رائے دہندگان نے گھر بیٹھے ووٹ کاسٹ کیا ۔
صدر طیب اردوگان نے اپنی اہلیہ کے ہمراہ استنبول میں اپنا ووٹ کاسٹ کیا ، اس موقع پر ان کا کہنا تھا کہ عوام بڑی تعداد میں ووٹ ڈالنے کیلئے باہر نکلی ہے ۔
ترکی میں ان انتخابات میں شہریوں کا جوش و خروش بھی دیدنی تھا جو اپنا حق رائے دہی استعمال کرنے جوق در جوق پولنگ اسٹیشنز پہنچے ، انقرہ میں ایک جوڑا اپنی شادی سے قبل ووٹ ڈالنے پولنگ بوتھ پہنچا ۔
صدارتی امیدوار کیلئے 50 فیصد سے زائد ووٹ لینا لازمی ہے ۔