بی بی سی کی رپورٹ پر وزیر اعظم کی وزارت داخلہ کو غیر جانبدارانہ تحقیقات کرنے کی ہدایت
اسلام آباد(92نیوز)وزیراعظم نوازشریف نے بی بی سی رپورٹ پروزارت داخلہ کو غیرجانبدارانہ تحقیقات کرنے کی ہدایت کردی ،پاکستان نشریاتی ادارے کی رپورٹ پر تعاون حاصل کرنے کے لئے کل برطانیہ کو خط ارسال کرے گا ۔
تفصیلات کے مطابق وزیراعظم نواز شریف سے وزیر داخلہ چودھری نثار علی خان نےاسلام آباد میں ملاقات کی جس میں متحدہ قومی موومنٹ کو بھارت کی جانب سے فنڈز دئیے جانے سے متعلق بی بی سی کی رپورٹ پر تفصیلی تبادلہ خیال کیا گیا۔
ملاقات میں وزیر اعظم کو ر پورٹ کے مندرجات سے آگاہ کیا گیاجس پر وزیراعظم نوازشریف نے ایم کیو ایم کو بھارتی فنڈ نگ دئیے جانے کے معاملے کی غیر جانبدارانہ اور شفاف تحقیقات کر نے کی ہدایت کی ۔
چودھری نثار نے بتایا کہ معاملے کی چھان بین شروع کر دی گئی ہے اور مختلف تحقیقاتی ایجنسیاں معاملے کی تہہ تک پہنچنے کے لئے ثبوت اکٹھے کر رہی ہیں ۔
علاوہ ازیں وزیر داخلہ چودھری نثار سے برطانوی ہائی کمشنر فلپ بارٹن نے ملاقات کی جس میں عمران فاروق قتل کیس، بی بی سی کی حالیہ ڈاکو منٹری سمیت دو طرفہ امور پر تبادلہ خیال کیا گیا۔
ذرائع کے مطابق بی بی سی رپورٹ سے متعلق پاکستان نےبرطانیہ کا تعاون حاصل کرنے کا فیصلہ کر لیا اس سلسلے میں وزیراعظم نوازشریف نے درخواست کا مسودہ منظور کر لیا ہے جسے پاکستانی دفتر خارجہ جمعہ کو برطانوی حکومت کو ارسال کرے گا ۔
