ممبئی میں مون سون بارشوں سے تباہی ، دو درجن سے زائد افراد ہلاک

 نیو دہلی (92 نیوز) بھارتی شہر ممبئی میں مون سون بارشوں نے تباہی مچا دی۔ مختلف حادثات میں دو درجن سے زائد افراد ہلاک ہو گئے ہیں۔ شہر کے نشیبی علاقے ندی نالوں کا منظر پیش کرنے لگے۔ موسلادھار بارشوں کے باعث ممبئی کے مغربی مضافاتی علاقے میلاڈ میں دیوار گرنے سے 21 افراد ہلاک ہو گئے جب کہ ممبئی کے نواح میں واقع گاؤں امبے میں کالج کی دیوار گرنے سے چھ افراد جان کی بازی ہار گئے۔ خراب موسم کے باعث زمینی و فضائی آمدورفت شدید متاثر ہوئی ہے۔ ممبئی ایئرپورٹ پر ایک طیارہ دوران لینڈنگ رن وے سے پھسل گیا۔ خوش قسمتی سے واقعے میں کوئی جانی نقصان نہیں ہوا۔ محکمہ موسمیات کے مطابق شہر میں دو روز کے دوران پانچ سو پچاس ملی میٹر بارش ہوچکی ہے جس نے 14 سال کا ریکارڈ توڑ ڈالا ہے۔ بارشوں کا یہ سلسلہ مزید تین روز تک جاری رہے گا۔