بھارت کی مشرقی ریاست جھاڑ کھنڈ میں بم دھماکے کے بعد ایک مسافر ٹرین کی تین بوگیاں پٹڑی سے اتر گئیں

پلامو ایکسپریس برکا کانا سے پٹنہ جا رہی تھی کہ جھاڑکھنڈ کے علاقے دلتون گنج میں ایک پل کے قریب بم دھماکے کے بعد پٹڑی سے اتر گئی۔ حکام کے مطابق بم ماؤ نواز باغیوں نے نصب کیا تھا۔ بھارتی ریلوے کے پبلک ریلیشنز افسر انیل سکسینا کا کہنا ہے کہ ٹرین پٹنہ جا رہی تھی کہ انجن ڈرائیور نے دھماکے کی آواز سن کر ایمرجنسی بریک لگائی جس سے انجن اور تین بوگیاں پٹڑی سے اتر گئیں تاہم ابھی تک کسی مسافر کے ہلاک یا زخمی ہونے کی کوئی اطلاع نہیں ہے۔ قریبی سٹیشن دلتون گنج پر موجود ایک مسافر کے مطابق ٹرین کے پٹڑی سے اترنے کی اطلاع پر اسٹیشن پر موجود مسافروں میں سراسیمگی پھیل گئی اور لوگوں نے اپنی ٹکٹیں منسوخ کرا دی ہیں۔ دھماکہ ایسے وقت ہوا جب ماؤ نواز باغیوں نے پولیس کے ہاتھوں اپنے بارہ ساتھیوں کی ہلاکت کیخلاف جھاڑکھنڈ میں ہڑتال کی کال دے رکھی ہے۔