سرینگر ( 92 نیوز) بھارت کی جانب سے آرٹیکل 370 کوختم کرنے پر بھارت نواز مسلم رہنما بھی چپ نہ رہے سکے، فیصلے کو سیاہ اور غیر آئینی قرار دے دیا۔
مودی حکومت کے پاگل پن پر بھارت نواز مسلم رہنما بھی چیخ اٹھے، کانگریسی رہنما غلام نبی آزاد نے راجیہ سبھا میں شدید احتجاج کرتے ہوئے کہا کشمیر کیلئے کئی لوگوں نے قربانی دی، آج بھارت نے جمہوریت کا خون کردیا ہے۔
مقبوضہ کشمیر کی سابق کٹھ پتلی وزیراعلٰی محبوبہ مفتی نے آج کے دن کو بھارتی جمہوریت کا سیاہ ترین دن قرار دیا ہے، اپنی ٹویٹ میں انھوں نے لکھا بھارتی حکومت نے ایک بار پھر کشمیریوں کو دیوار کے ساتھ لگا دیا ہے،اس غیرقانونی اورغیرآئینی اقدام کی مخالفت کرنے کے علاوہ کوئی راستہ نہیں ہے، اپنے گھر میں نظر بند محبوبہ مفتی نے ٹویٹر پر اپنا آڈٰیو پیغام جاری کرتے ہوئے لکھا کہ اب رابطے کایہی راستہ بچا ہے۔
نیشنل کانفرنس کے نائب صدرعمرعبداللہ نے اپنے بیان میں بھارتی حکومت کے اس فیصلے کو یک طرفہ قرار دیا ہے، ان کا کہنا تھا کہ بھارت نے جموں و کشمیر کے عوام کے اس اعتماد کو دھوکہ دیا جو انہوں نے 1947 میں اس پر کیا تھا،، اس فیصلے کے دور رس اور خطرناک نتائج نکلیں گے۔