بلوچستان کے سیاسی معاملات حل کرنے کیلئے چودھری نثار کو خصوصی ٹاسک مل گیا

اسلام آباد (92نیوز) وزیر داخلہ چودھری نثار علی خان کی صدارت میں بلوچستان میں سیاسی اور انتظامی معاملات سے متعلق اہم اجلاس آج ہورہا ہے۔ اجلاس میں وزارتوں میں ردوبدل اور سپیکر کے معاملات پر مشاورت کی جائے گی۔ تفصیلات کے مطابق وزیراعظم نواز شریف نے بلوچستان کے معاملات حل کرنے کے لیے چودھری نثار علی خان کو ذمہ داری سونپ رکھی ہے۔ اس معاملے پر وزیر داخلہ نے ایک اعلیٰ سطحی اجلاس بلایا ہے۔ اجلاس میں وفاقی وزیر ریلوے سعد رفیق‘ نامزد وزیر اعلیٰ بلوچستان ثناءاللہ زہری، ڈاکٹر عبد المالک بلوچ، محمود خان اچکزئی اور میر حاصل بزنجو شرکت کر رہے ہیں۔ اجلاس میں صوبے کے سیاسی اور انتظامی معاملات زیر غور آئیں گے۔ اجلاس میں سپیکر اور وزارتوں میں ردوبدل پر مشاورت کی جائے گی۔ صوبے کے معاملات حل ہونے پر بلوچ رہنماوں کی وزیر اعظم سے ملاقات بھی متوقع ہے۔