اینٹی نارکوٹکس فورس کا سابق لیگی ایم پی اے فوزیہ ایوب کے گھر چھاپہ، بیٹا طیب ایوب گرفتار
بہاولپور (92 نیوز) اینٹی نارکوٹکس فورس نے بہاولپور میں سابق لیگی ایم پی اے فوزیہ ایوب کے گھر پر چھاپہ مار کر ان کا بیٹا طیب ایوب گرفتار کر لیا۔ طیب ایوب سے چار من چرس برآمد کر لی گئی۔
اینٹی نارکوٹکس فورس ذرائع کے مطابق گرفتار ملزم کی نشاندہی پر اے این ایف نے بہاولپور کے علاقہ کوثر کالونی میں ن لیگی سابق ایم پی اے فوزیہ ایوب کے گھر پر چھاپہ مارا۔
ملزم طیب ایوب کی نشاندہی پر اے این ایف نے آزاد امیدوار پنجاب اسمبلی اسلم رند کے گھر پر بھی چھاپہ مارا۔ کارروائی کے دوران اسلم رند کے بیٹے عدیل اسلم کو گرفتار کر لیا گیا۔
اینٹی نارکوٹکس فورس دونوں ملزمان کو لے کر لاہور روانہ ہوئی۔ کچھ دن پہلے اے این ایف نے ن لیگ کے ایم پی اے رانا ثناء اللہ کو پندرہ کلو ہیروئن سمیت گرفتار کیا تھا۔