ایف آئی اے نے متحدہ کی رفاہی تنظیم کے اکاؤنٹ سے لندن رقم منتقلی کی تفصیلات اکٹھی کرلیں

اسلام آباد ( 92 نیوز) متحدہ قائدین کے خلاف منی لانڈرنگ مقدمات میں اہم پیشرفت ہوئی ہے ، ایف ائی اے  نے رفاہی تنظیم کے اکاؤنٹ سے لندن  رقم منتقلی کی تمام تفصیلات اکٹھی کرلیں۔ مقدمات کراچی سے اسلام آباد منتقل کرنے کیلئے سپریم کورٹ کی حتمی منظور ی کا انتظار ہے ۔ منی لانڈرنگ کی تحقیقات کا دائرہ کار وسیع کر دیا گیا جس کے بعد متحدہ قائد ین کے خلاف گھیر ا تنگ ہونے لگا ہے ۔ تحقیقات میں اہم پیشرفت ہوئی  ہے ،  ایف ائی اے اسلام آباد سرکل نے لندن رقوم منتقلی کا ریکارڈ اکٹھا کرلیا  ہے ۔ خدمت خلق فاونڈیشن کے اکاؤنٹس سے رقوم لندن بھجوائے جانے کا انکشاف ہوا ہے۔ اکاؤنٹس سے 4 لاکھ، 60 ہزارا مریکی ڈالر ،  4 لاکھ، 58 ہزار برطانوی پاونڈ، 21 ہزار درہم  مختلف ٹرانزکشن کے ذریعے بانی ایم کیو ایم کے اکاونٹ میں منتقل کیے گئے ۔ ایف آئی اے کو مقدمات کراچی سے اسلام آباد منتقل کرنے کیلئے سپریم کورٹ کی حتمی منظوری کا انتظار ہے ،  مقدمات کی منتقلی کے بعد ایف ائی اے عدالت میں ریکارڈ پیش کرے گا۔  ایف آئی اے کی جانب سے 10 متحدہ رہنماؤں  بشمول فاروق ستار، ارشد وہرا ، سہیل منصور، کنور نوید جمیل  کے خلاف منی لانڈرنگ کی تحقیقات کی جارہی ہیں۔