او آئی سی اجلاس میں اسرائیل کو موثر جواب دینا چاہیے ،ایرانی صدر

تہران (92 نیوز) ایرانی صدر حسن روحانی نے فلسطینیوں پر مظالم کی مذمت کرتے ہوئے مسلم ممالک پر اسرائیل کو موثر جواب دینے پر زور دیا ۔ ایرانی میڈیا کے مطابق حسن روحانی اور امیر قطر شیخ تمیم بن حماد الثانی میں ٹیلی فونک گفتگو ہوئی ۔ دونوں رہنماؤں میں اسرائیلی فورسز کی فلسطینیوں کیخلاف وحشیانہ کارروائیوں کی شدید مذمت سامنے آئی۔ اس موقع پر ایرانی صدر نے فلسطینیوں کے قتل عام کو مجرمانہ اقدام قرار دیا۔ انہوں نے کہا کہ او آئی سی اجلاس میں اسرائیل کو مناسب اور موثر جواب دینا چاہیے ۔ حسن روحانی نے مزید کہا کہ وہ دن دور نہیں جب فلسطین آزاد اور مقبوضہ بیت المقدس اُس کا دارالحکومت ہو گا۔