انجمن تاجران کا ٹیکسز کے خلاف کل سے ملک بھرمیں 2 روزہ ہڑتال کا اعلان

لاہور (92 نیوز) آل پاکستان انجمن تاجران نے ایف بی آر کے ٹیکسز اور تاجر دشمن پالیسیوں کے خلاف کل اور 30 اکتوبر کو ملک بھرمیں مکمل ہڑتال کرنے کا اعلان کر دیا، مرکزی جنرل سیکرٹری نعیم میر کا کہنا تھا کہ مذاکرات نہیں ہوں گرفتاریوں سے ڈرنے والے نہیں۔ لاہورمیں نیوز کانفرنس کرتے ہوئے آل پاکستان انجمن تاجران کے مرکزی جنرل سیکرٹری نعیم میر حکومت پر برس پڑے، کہا کہ تاجر ہڑتال نہیں کرنا چاہتے لیکن انہیں مجبور کیا جا رہا ہے۔ انجن تاجران مال روڈ کے صدر سہیل محمود بٹ کا کہنا تھا کہ مال روڈ پر آئے روڈ احتجاج اور دھرنوں سے کاروبار تباہ ہو گئے ہیں۔ آل پاکستان انجمن تاجران کے عہدیداران کا کہنا تھا کہ حکومت تاجروں کے لئے تعصب کی عینک اتارے اور جگ ہنسائی کے بجائے ان کے مسائل حل کرے۔