امریکی وزیرخارجہ وفد کے ہمراہ ایک روزہ دورے پر پاکستان پہنچ گئے

اسلام آباد( 92 نیوز) امریکی وزیرخارجہ وفد کے ہمراہ ایک روزہ دورے پر پاکستان پہنچ گئے،وہ شام 4 بجے وزیراعظم پاکستان عمران خان سے ملاقات کریں گے ۔ امریکی وزیر خارجہ مائیک پومپیو کی پاکستانی  ہم منصب شاہ محمود قریشی سے ون ٹو ون اور وفود کی سطح پر ملاقاتیں طے  ہیں ، ان کی پاکستانی آرمی چیف سے بھی ملاقات کا امکان ہے ۔ امریکہ سے روانگی سے قبل میڈیا سے گفتگو میں امریکی وزیر خارجہ کا کہنا تھا کہ وہ دونوں ممالک کے درمیان بہتر تعلقات چاہتے ہیں ، دونوں ممالک کے درمیان تعلقات بہتر ہوں گے ۔ مائیک پومپیو کا کہناتھا پاکستان اور امریکا کافی عرصے سے ایک ساتھ کام کر رہےہیں ، عمران حکومت کے ساتھ مل کر مشترکہ مسائل  کے حل کیلئے بہتر طریقے سے کام کریں گے ۔ امریکی وزیرخارجہ مائیک پومپیو نے میڈیا سے گفتگو میں اس امید کا بھی اظہار کیاکہ پاکستان افغانستان میں امن کے قیام کیلئے امریکا کی مدد کرے گا۔