امریکہ بہادر تمہیں خوش کرنے کیلئے اپنی معیشت تباہ کرلی ،خواجہ آصف
اسلام آباد ( 92 نیوز ) وفاقی وزیر خارجہ خواجہ محمد آصف نے ڈونلڈ ٹرمپ کے ٹویٹ کا جواب دیتے ہوئے کہا کہ امریکا بہادر!تمہیں خوش کرنے کیلئےاپنی معیشت تباہ کرلی ۔ ایک آمر نے ایک فون پر سرنڈر کردیا ۔ پاک وطن کو بارود اور خون سے نہلایا ۔ ہزاروں سویلین اور فوجی تمہاری جنگ کی بھینٹ چڑھ گئے ۔ افغانستان میں اسلحہ بارود ہماری گزرگاہوں سے گیا ۔ پھر بھی تم پوچھتے ہو پاکستان نے کیا کیا؟۔
وزیرخارجہ خواجہ آصف نے ٹویٹ میں کہا کہ تم پوچھتے ہو ہم نے کیا کیا؟ ۔ آپ کو خوش کرنے کیلئے کیا نہیں کیا؟۔ وطن کو بارود اور خون سے نہلایا، افغانستان پر اپنے اڈوں سے تمہارے 57ہزار 800 حملے ہوئے ۔ ہماری گزرگاہوں سے تمہارا اسلحہ، بارود گیا ۔ ہزاروں سویلین، فوجی، بریگیڈئیر، جنرل اور جواں سال لیفٹیننٹ آپ کی چھیڑی جنگ کی بھینٹ چڑھ گئے ۔
خواجہ آصف نے کہا کہ ہماری معیشت برباد ہوگئی لیکن خواہش تھی آپ راضی رہیں ۔ ہم نے لاکھوں ویزے پیش کئے بلیک واٹر کیلئے، ریمنڈ ڈیوس نیٹ ورک جگہ جگہ پھیل گئے ۔ ہمارے وقار پر اب سمجھوتہ نہیں ہوگا۔
خواجہ آصف نے کہا کہ اپنی ناکامی کا ملبہ ہماری دہلیز پر نہ رکھو ۔ ماضی امریکا پر اعتماد میں احتیاط کا سبق سکھاتا ہے ۔ اب وقار پر سمجھوتہ نہیں کریں گے ۔