اقتصادی رابطہ کمیٹی اجلاس‘ حبیب بینک کو چین میں برانچ کھولنے کی اجازت مل گئی

اسلام آباد (92نیوز) اقتصادی رابطہ کمیٹی نے ایران سے 74 میگاواٹ بجلی خریدنے کے معاہدے کی منظوری اور حبیب بینک کو چین میں برانچ کھولنے کیلئے سرمایہ منتقل کرنے کی اجازت دیدی ہے۔ تفصیلات کے مطابق وزیر خزانہ اسحاق ڈار کی زیر صدارت اقتصادی رابطہ کمیٹی کے اجلاس میں ایران سے 74 میگاواٹ بجلی خریدنے کے معاہدے کی منظوری دیدی گئی ہے جبکہ پاکستان اور چین کے درمیان طے پا جانے والے براہ راست بینکنگ چینل معاہد ے کے تحت حبیب بینک لمیٹڈکو چین میں برانچ کھولنے کیلئے سرمایہ منتقل کرنے کی اجازت بھی دیدی ہے۔ برانچ کھولنے سے پا ک چین اقتصادی راہداری منصوبوں کے لیے ادائیگیوں میں سہولت پیدا ہو گی۔ چین نے کئی اہم شرائط میں پاکستان کو رعایت دی ہوئی ہے جس کے تحت حبیب بینک لمیٹڈ کیلئے برانچ کھولنے کیلئے سرمایہ کی حدبیس ارب ڈالر سے کم کرکے پندرہ ارب ڈالر کردی گئی ہے۔   اس کیساتھ ساتھ حبیب بنک ایک سال بعد چینی کرنسی میں بھی کاروبار کر سکے گا جبکہ دو سال تک مسلسل بینک کو منافع بخش رہنے کی شرط ختم کردی گئی ہے۔ حبیب بینک رواں سال کے آخر تک چین کے شہر ارمچی میں برانچ کھول لے گا۔ اجلاس کو ملک کی تازہ ترین معاشی صورت حال پر بھی تفصیلی بریفنگ دی گئی۔