افغانستان کے صدر ڈاکٹر محمد اشرف غنی دو روزہ دورے پر پاکستان پہنچ گئے
اسلام آباد ( 92 نیوز) افغانستان کے صدر ڈاکٹر محمد اشرف غنی دو روزہ دورے پر پاکستان پہنچ گئے ، افغان صدر نور خان ائیر بیس پہنچے جہاں مشیر تجارت عبدالرزاق داؤد نے افغان صدر کا استقبال کیا ۔
افغان صدر نے پاکستانی وزیر خارجہ شاہ محمود قریشی سے ملاقات کی ، انہوں نے افغان امن عمل میں پاکستانی کاوشوں کو سراہا ۔ اس موقع پر شاہ محمود قریشی نے کہا کہ پاکستان افغانستان میں قیام امن کے لئے اپنا کردار مخلص ، نیک نیتی کیساتھ جاری رکھے گا۔
افغان صدر وزیر اعظم ہاؤس پہنچے جہاں وزیر اعظم عمران خان نے کابینہ کے ارکان کے ہمراہ ان کا استقبال کیا ۔ ڈاکٹر محمدا شرف غنی کو گارڈ آف آنر پیش کیا گیا ، ڈاکٹر اشرف غنی نے گارڈ آف آنر کا معائنہ کیا۔
وزیراعظم عمران خان نے افغان صدر کا اپنے کابینہ ارکان سے فرداً ، فرداً تعارف کرایا ۔