افغان صوبے ہلمند میں سرحدی چیک پوسٹ پر طالبان کا حملہ،بائیس اہلکار ہلاک، سات سرحدی اہلکار لاپتہ

ہلمند (ویب ڈیسک) افغانستان کے جنوب میں واقع ہلمند صوبے میں شدید لڑائی کے دوران سرحدی پولیس کے بائیس اہلکار ہلاک ہو گئے، جھڑپوں میں پینتیس طالبان بھی مارے گئے۔ افغان حکام کے مطابق سینکڑوں طالبان نے ضلع نوزاد میں کالامی کریز سرحدی چیک پوسٹ پر دھاوا بول دیا۔ لڑائی میں ایک درجن کے قریب افغان سیکیورٹی اہلکار زخمی بھی ہوئے۔ ہلمند حملے میں افغان سرحدی پولیس کے سات اہلکار لاپتہ ہو گئے ہیں۔ طالبان دو ماہ قبل یہ ضلع چھوڑ کر فرار ہو گئے تھے۔ طالبان نے ہلمند کے ضلع موسیٰ قلعہ کے بعض حصوں پر بھی قبضہ کر لیا تھا تاہم حکام کا کہنا ہے کہ طالبان سے یہ علاقہ خالی کرا لیا گیا ہے۔