اسٹیٹ بینک کا روپے کی قدر کا تعین مارکیٹ کے حوالے کرنے پر اعتراض
اسلام آباد (92 نیوز) پاک آئی ایم ایف مذاکرات میں نیا موڑ آ گیا ۔ پاکستان کا آئی ایم ایف کے ساتھ معاہدے کی بنیادی شرائط پر اختلاف رائے پیدا ہو گیا ۔
ذرائع کے مطابق اسٹیٹ بنک حکام نے روپے کی قدر کا تعین کلی طور پر مارکیٹ کے حوالے کرنے پر اعتراض اٹھا دیا ۔ بجلی، گیس اور پٹرولیم کی قیمتیں بڑھانے کے شیڈول پر متعلقہ اداروں کا بھی منفی رد عمل سامنے آ گیا ۔
ایف بی آر نے بھی سیلز ٹیکس کی شرح اور دائرہ کار وسیع کرنے پر تحفظات کا اظہار کر دیا ۔ ذرائع کا کہنا ہے اداروں کے اعتراضات اور تحفظات کے باوجود آئی ایم ایف سے مذاکرات آگے بڑھائے جائیں گے ۔
آئی ایم ایف اور وزارت خزانہ حکام نے اعتراضات اور تحفظات پر متوازی کمیٹی بنانے پر اتفاق کیا ہے ۔ کمیٹی اراکین کم از کم ممکنہ شرائط پر اتفاق رائے پیدا کرنے کی کوشش کریں گے ۔