Friday, March 29, 2024

اسلام آباد چیمبر آف کامرس اینڈ انڈسٹری کے وفد کا نیول ہیڈکوارٹرز اسلام آباد کا دورہ

اسلام آباد چیمبر آف کامرس اینڈ انڈسٹری کے وفد کا نیول ہیڈکوارٹرز اسلام آباد کا دورہ
February 18, 2020
 اسلام آباد (92 نیوز) اسلام آباد چیمبر آف کامرس اینڈ انڈسٹری کے صدر محمد احمد کی سربراہی میں وفد نے نیول ہیڈ کوارٹرز اسلام آباد کا دورہ کیا۔ صدر اسلام آباد چیمبر آف کامرس اینڈ انڈسٹری نے چیف آ ف دی نیول اسٹاف ایڈمرل ظفر محمود عباسی سے ان کے دفتر میں ملاقات کی۔ بریفنگ کے دوران نیول چیف نے وفد کا خیر مقدم کیا اور اس بات پر زور دیا کہ نجی شعبہ پاک بحریہ کے ترقیاتی منصوبوں اور بحری شعبوں میں مقامی صنعت کی ترقی کو فروغ دینے میں اپنا مثبت کردار ادا کرے۔ امیرالبحر نے دفاعی پیداوار کے منصوبوں میں باہمی تعاون اور مشترکہ منصوبوں کی مد میں خود انحصاری کو مزید وسعت دینے کی ضرورت پر بھی زور دیا۔ اس کے علاوہ وفد کو ایک بریفنگ بھی دی گئی جس میں نجی شعبے کی شمولیت سے متعلق مختلف منصوبوں کو اجاگر کیا گیا۔ وفد کو پاک بحریہ کے ترقیاتی منصوبوں کے بارے میں بھی بتایا گیا۔ بعدازاں ، صدر اسلام آباد چیمبر جناب محمد احمد نے وفد کی جانب سے مکمل تعاون کی یقینی دہانی کرائی اور پاکستان نیوی کو بلیو اکانامی کے بارے میں آگاہی پیدا کرنے پر سراہا۔ انہوں نے مزید کہا کہ پاک بحریہ کے ریسرچ اینڈ ڈویلپمنٹ سنٹر کے قیام سے بالعموم صنعتی اور بالخصوص دفاعی پیداوار کے شعبے کو فروغ ملے گا۔ سال 2018 میں چیف آف دی نیول اسٹاف کی پاکستان چیمبر آف کامرس( کراچی) ، فیڈریشن آف پاکستان چیمبر آف کامرس اینڈ انڈسٹری اور کورنگی ایسوسی ایشن آف ٹریڈ اینڈ انڈسٹری کے وفود سے بات چیت کے دوران نیول چیف نے ملک کے سمندری شعبے کی ترقی میں کاروباری برادری کی مطلوبہ شرکت پر زور دیا تھا۔ حالیہ بات چیت ملکی خود انحصاری کی طرف کاوشوں کا تسلسل ہے۔ پرائیویٹ سیکٹر کی دفاعی پیداوار کے شعبے میں شمولیت سے خود انحصاری اور مقامی صنعت کے فروغ کے لیے نئی راہیں ہموارہوں گی۔