آسٹریلیا میں شدید طوفان اور بارشیں، چار افراد ہلاک، کئی گھر اور سڑکیں طوفان کی نذر

آسٹریلیا (ویب ڈیسک) آسٹریلیا کے صوبے نیو ساؤتھ ویلز میں شدید طوفان اور بارش کی وجہ سے چار افراد ہلاک ہو گئے۔ کئی گھر اور سڑکیں بھی بہہ گئیں۔ حکام کے مطابق سنٹرل ہنٹر کے علاقے میں ایک چھیاسی سالہ معمر خاتون سیلاب کے پانی میں گاڑی بہنے سے ہلاک ہو گئی جبکہ سڈنی کے شمالی علاقے دنگوگ  میں ایک خاتون سمیت تین افراد کی لاشیں ملی ہیں جہاں طوفان اور سیلاب میں بہت سے گھر بہہ گئے ہیں۔ دنگوگ  ان بارہ علاقوں میں سے ایک ہے جسے حکومت کی جانب سے آفت زدہ قرار دیا جا چکا ہے۔ آسٹریلیا کے محکمہ موسمیات کا کہنا ہے کہ ساحلی علاقوں میں سو کلومیٹر سے زیادہ کی رفتار سے طوفانی ہوائیں چل سکتی ہیں اور سڈنی کے بعض علاقوں میں سیلاب آ سکتے ہیں۔