آئی جی سندھ کی وزیراعظم سے ملاقات،خود پر لگے الزامات پر بریفنگ
اسلام آباد ( 92 نیوز) آئی جی سندھ نے وزیر اعظم عمران خان سے اسلام آباد میں ملاقات کی ، ملاقات میں کلیم امام نے اپنے اوپر لگے الزامات پر وزیر اعظم کو بریفنگ دی ۔
وزیراعظم عمران خان سے آئی جی سندھ کلیم امام نے اہم ملاقات کی جس میں سندھ کی امن و امان کی صورتحال پر بات چیت ہوئی ، آئی جی کی سندھ حکومت کی جانب سے عائد الزامات پر بریفنگ دی گئی ، انہوں نے سائیں سرکار کی چارج شیٹ مسترد کردی ۔
آئی جی نے حکومت سندھ کے افراد کے خلاف ہونے والی کارروائی سے وزیراعظم کو آگاہ کیا ، بتایا کہ پولیس نے صوبائی کابینہ ارکان کے خلاف کارروائی شروع کی تو سندھ حکومت خلاف ہوگئی ، میں نے اپنا کام نیک نیتی سے کیا ہے، میرا ٹریک رکارڈ سب کے سامنے ہے ، کبھی ذاتیات کو میرٹ پر ترجیح نہیں دی ، میں حکومت پاکستان کا ملازم ہوں، پاکستان کے آئین کے مطابق کام کرنے کا پابند ہوں ، حکومت مجھے جہاں تعینات کرے، مجھے کوئی اعتراض نہیں۔
وزیراعظم عمران خان نے سندھ میں امن و امان کے قیام سے متعلق آئی جی سندھ کی خدمات کو سراہا اور انہیں وفاق میں اہم ذمہ داریاں دینے کا عندیہ دے دیا ، ذرائع کا کہنا ہے کہ کلیم امام کو سیکرٹری نارکوٹکس کنٹرول لگائے جانے کا امکان ہے۔