فرمان الہی

لاہور (92 نیوز) - کاؤنٹر ٹررزم ڈپارٹمنٹ (سی ٹی ڈی) نے پنجاب کے مختلف اضلاع میں انٹیلی جنس بیسڈ آپریشن میں کالعدم تنظیم کے 9 دہشت گردوں کو گرفتار کرلیا۔

امن دشمنوں کے خلاف قانون نافذ کرنے والے اداروں کی کارروائیاں جاری ہیں، سی ٹی ڈی نے پنجاب کے مختلف اضلاع میں انٹیلی جنس بیسڈ آپریشن کرکے کالعدم تنظیم سے تعلق رکھنے والے 9 مبینہ دہشت گرد گرفتارکرلیے۔

سی ٹی ڈی پنجاب کے مطابق گرفتار دہشت گردوں میں عفان، کاشف، جواد سعید، ثاقب الیاس، سبز علی، داؤد شاہ اور احمد جان شامل ہیں۔ گرفتار دہشت گردوں کے خلاف 10 مقدمات درج کرلیے گئے۔

سی ٹی ڈی حکام کے مطابق کارروائی کے دوران خودکش جیکٹ، دھماکہ خیز مواد، ہینڈ گرنیڈ، ڈیٹونیٹر، ریموٹ کنٹرول ڈیوائس اور حساس مواد پر مشتمل کتابیں بھی ملیں ہیں۔

گرفتار دہشت گردوں کا تعلق کالعدم ٹی ٹی پی اور داعش کے مختلف گروپوں سے ہے۔

سی ٹی ڈی حکام کا کہنا ہے کہ رواں ہفتے پانچ سوچونسٹھ کومبنگ آپریشنز میں ترانوے مشتبہ افراد گرفتار کیے گئے۔