Saturday, July 2, 2022

شہنشاہ غزل مہدی حسن کو ہم سے بچھڑے 11 برس بیت گئے

شہنشاہ غزل مہدی حسن کو ہم سے بچھڑے 11 برس بیت گئے
June 13, 2022 ویب ڈیسک

کراچی (92 نیوز) - شہنشاہ غزل کے لقب سے مشہور مہدی حسن کو ہم سے بچھڑے 11 برس بیت گئے۔

ہر گیت لازوال، مہدی حسن جو گایا امر کر دیا، غزل ہو یا گیت مہدی حسن کا کوئی ثانی نہیں۔ ہر فلم کی کامیابی کی ضمانت بنے، گیت اور غزلیں آج بھی زمانے میں مقبول ہیں۔

ملکہ ترنم نور جہاں نے ایک مرتبہ مہدی حسن سے متعلق کہا تھا میں نے صرف تان سین کا نام سنا تھا لیکن انہیں دیکھا تو مہدی حسن کے روپ میں، جب بھی غزل گائیکی کا ذکر ہو گا تو اس میں مہدی حسن کا نام سب سے پہلے شامل ہو گا کیونکہ انہوں نے غزل گائیکی کو ایک نئی جدت سے روشناس کروایا، جو بھی گایا وہ سننے والوں پر سحر طاری کر گیا۔

کئی دہائیوں پر محیط اس سفر میں انھوں نے 25 ہزار سے زائد فلمی و غیر فلمی گیت نغموں اور غزلوں میں اپنی آواز کا جادو جگایا۔ اپنی بہترین گائیکی پر 9 نگار پبلک فلم ایوارڈ اور لاتعداد دیگر ایوارڈ حاصل کیے۔ پڑوسی ممالک نے بھی ان کی شاندار خدمات کا اعتراف کیا اور کئی ایوارڈز سے نوازا۔

فلم فرنگی کے لیے فیض احمد فیض کی غزل ’گلوں میں رنگ بھرے’ ریکارڈ کروائی تو غزل گائیکی کو ایک نیا انگ اور آہنگ مل گیا جس نے غزل کو ایک نئی زندگی عطا کر دی۔

مہدی حسن صرف ایک گلوکار نہیں بلکہ ایک عہدکا نام ہے،،وہ موسیقی کی درسگاہ کا درجہ رکھتے تھے، طویل علالت کے بعد مہدی حسن 13 جون 2012 کو کراچی میں انتقال کر گئے۔ شہنشاہ غزل نارتھ کراچی کے محمد شاہ قبرستان میں آسودہ خاک ہیں۔