فرمان الہی

لاہور (92 نیوز) - نگران وزیراعلیٰ پنجاب نے نشہ آور اشیا ء بیچنے اور استعمال کرنے والوں کیخلاف سخت کریک ڈاؤن کا حکم دے دیا۔ محسن نقوی نے کہا سڑکوں کے اطراف منشیات کے عادی افراد کی موجودگی تشویشناک ہے، اے این ایف او ردیگر اداروں کے اشتراک سے منشیات کے مسئلے کو مستقل بنیادوں پر حل کیا جائے گا۔

نگران وزیراعلیٰ پنجاب محسن نقوی کی زیر صدارت لاہور میں خصوصی اجلاس ہوا، جس میں نشہ آور اشیا ء بیچنے اوراستعمال کرنے والوں کے خلاف سخت کریک ڈاؤن کا حکم دے دیا گیا۔

نشے کے عادی افراد کی بحالی کے لئے خصوصی سنٹر کے قیام کا فیصلہ بھی کیا گیا،  نشے کے عادی افراد کو قیام و طعام اور علاج کی مفت سہولت فراہم کی جائے گی۔

محکمہ صحت نشے کے عادی افراد کی مستقل بحالی کے لئے ڈاکٹر، طبی عملہ اور ادویات فراہم کرے گا، محکمہ سوشل ویلفیئر نشے کے عادی افراد کیلئے قیام و طعام اور دیگر انتظامات کرے گا، پولیس نشے کے عادی افراد کی نقل وحرکت محدود بنائے گی اور سکیورٹی مہیا کرے گی۔

نگران وزیراعلیٰ نے رائیونڈ روڈ پر منشیات کے عادی افراد کی بحالی کے لئے خصوصی سنٹر کو فوری فنکشنل کرنے کی ہدایت کردی، انہوں نے پولیس کوہدایت کی کہ سکولوں اورکالجز میں منشیات فروشی کو ہر قیمت پر روکا جائے۔