پنجاب حکومت کا 25 مئی کو پی ٹی آئی رہنماؤں اور کارکنوں پر تشدد میں ملوث افراد کے خلاف کارروائی کا فیصلہ
لاہور (92 نیوز) - پنجاب حکومت نے 25 مئی کو پی ٹی آئی رہنماؤں اور کارکنوں پر تشدد میں ملوث افراد کے خلاف کارروائی کا فیصلہ کر لیا۔
ذرائع کے مطابق پنجاب حکومت کی جانب سے فوری گرفتاریاں شروع کرنے کا حکم دیا گیا ہے۔ ادھر عمران خان کی سکیورٹی کے لیے بھی پنجاب حکومت سر توڑ کوششیں کرنے لگی۔ صوبائی وزیر داخلہ کرنل ریٹائرڈ محمد ہاشم ڈوگر نے کہا اپنے لیڈر کی سکیورٹی ہر حال یقینی بنائیں گے۔ جس جس نے اداروں کے بارے میں ہرزہ سرائی کی ہے ان کے خلاف ایکشن کی ہدایت جاری کی ہے۔ 92 نیوز سے گفتگو کرتے ہوئے انہوں نے کہا وزیر اعلیٰ پنجاب آئین و قانون کے مطابق احکامات جاری کریں گے۔
دوسری جانب پاکستان تحریک انصاف کے کارکنوں کو کسی بھی کال کے لئے تیار رہنے کی ہدایت کی گئی ہے۔ عمران خان کی گرفتاری کی کوشش کی صورت میں فوری ردعمل دینے کا فیصلہ کیا گیا ہے۔