پاکستان آئی ایم ایف اور ورلڈبینک کا ممبر ہے، بھکاری نہیں، اسحاق ڈار

اسلام آباد (92 نیوز) - وزیرخزانہ اسحاق ڈار کا کہنا ہے پاکستان آئی ایم ایف اور ورلڈبینک کا ممبر ہے، بھکاری نہیں۔

ایک ویڈیو بیان میں انہوں نے کہا کہ حکومت اسٹاف لیول معاہدے کیلئے اپنا کام کرچکی، مشکلات کے باوجود کوئی بین الاقوامی ادائیگی ایک منٹ بھی لیٹ نہیں ہوئی۔

اسحاق ڈار بولے آنے والوں دنوں میں پاکستان دوبارہ ترقی کی جانب گامزن ہوگا۔ وزیراعظم کی ہدایت پر آئی ایم ایف اجلاس میں نہ جانے کا فیصلہ کیا، ورچوئل شرکت ہوگی۔

وزیر خزانہ کا کہنا ہے کہ حکومت ملک کی ترقی کے لیے نئی سکیمیں لانے کی منصوبہ بندی کر رہی ہے۔ آٹھ سو سی سی تک موٹرسائیکلوں اور کاروں کو ایندھن کی سبسڈی کی فراہمی زیر غور ہے۔

ان کا کہنا تھا کہ وہ بین الاقوامی مالیاتی فنڈ کے آئندہ سالانہ موسم بہار کے اجلاس میں عملی طور پر شرکت کریں گے۔ ہماری ٹیم معمول کے مطابق طے شدہ میٹنگز میں شرکت کرے گی جبکہ وہ عملی طور پر اہم میٹنگز میں شرکت کریں گے۔

اسحاق ڈار کا کہنا تھا کہ آئی ایم ایف کے اجلاس میں عملی طور پر شرکت کرنے کا فیصلہ کیا کیونکہ سپریم کورٹ آف پاکستان نے حکومت سے کہا ہے کہ وہ پنجاب میں انتخابات کرانے کے لیے الیکشن کمیشن آف پاکستان کو فنڈز فراہم کرے۔

وزیرخزانہ نے مزید کہا کہ پاکستان نے گزشتہ چند ماہ میں گیارہ ارب ڈالر کا قرضہ واپس کیا ہے۔ امید ہے کہ آئی ایم ایف کے ساتھ عملے کی سطح کے معاہدے کو جلد حتمی شکل دی جائے گی۔