پاک بحریہ کے جہاز شمشیر کا ریجنل میری ٹائم سکیورٹی پٹرول کے تحت دورہ عمان
اسلام آباد (92 نیوز) - پاک بحریہ کے جہاز شمشیر نے ریجنل میری ٹائم سکیورٹی پٹرول پر تعیناتی کے دوران عمان کی بندرگاہ مسقط کا دورہ کیا۔
مسقط آمد پر عمان میں پاکستان کے سفیر اور رائل نیوی آف عمان کے حکام نے جہاز کا استقبال کیا۔
دورے کے دوران پی این ایس شمشیر کے کمانڈنگ آفیسر نے کمانڈر سید بن سلطان نیول بیس اور رائل نیوی آف عمان کی ڈپٹی کمانڈنٹ نیول اکیڈمی سے ملاقات کی۔ ملاقات کے دوران باہمی دلچسپی کے امور پر گفت و شنید کے علاوہ تمام شعبوں میں دوطرفہ تعلقات کو فروغ دینے کے عزم کا اعادہ کیا گیا۔
اس موقع پر کمانڈنگ آفیسر نے چیف آف دی نیول اسٹاف ایڈمرل محمد امجد خان نیازی کی جانب سے عمان کی عوام اور عمانی بحریہ کے لئے نیک خواہشات کا پیغام پہنچایا۔ بندرگاہ کے دورے کے دوران پیشہ وارانہ امور پر مذاکرات اور دو طرفہ ملاقاتوں کا انعقاد کیا گیا۔
بندرگاہ کے دورے کے دوران، دو طرفہ مشقوں کا انعقاد کیا گیا جن میں پیشہ وارانہ امور پر مذاکرات، مختلف تنصیبات کے دورے اور بحری جہاز پر سرچ اور سیژر ٹریننگ شامل ہیں۔
دورے کے اختتام پر پی این ایس شمشیر نے دونوں ممالک کے مابین مشترکہ آپریشنز کے فروغ کے لیے رائل عمانی بحریہ کے جہاز خصّاب کے ساتھ دو طرفہ مشق میں حصہ لیا۔
پاک بحریہ امن کے فروغ پر یقین رکھتی ہے اور بحری سیکیورٹی اور استحکام کے لیے پُرعزم ہے۔ پاک بحریہ کے جہاز کامسقط کا دورہ، دوطرفہ سفارتی تعلقات کو مضبوط بنانے اور دونوں بحری افواج کے درمیان باہمی تعاون کو فروغ دینے میں معاون ثابت ہوگا۔
