بھارتی فوج کی ورکنگ باونڈری پر شیلنگ‘ ایک پاکستانی شہید‘ پانچ زخمی

سیالکوٹ (92نیوز) بھارتی فوج کی ایک بار پھر سیز فائر کی خلاف ورزی‘ ورکنگ باونڈری کے ہرپال اور چپراڑ سیکٹر پر فائرنگ اور شیلنگ سے ایک پاکستانی شہری شہید جبکہ پانچ زخمی ہو گئے۔ آئی ایس پی آر کے مطابق اکیس اکتوبر سے اب تک ورکنگ باونڈری پر چار شہری شہید ہو چکے ہیں جبکہ اکیس زخمی ہوئے۔ تفصیلات کے مطابق بھارتی سکیورٹی فورسز کی جانب سے سیالکوٹ کے سرحدی علاقوں میں بلا اشتعال فائرنگ اور شیلنگ کا سلسلہ رات بھر جاری رہا۔ بھارتی فورسز نے رہائشی آبادیوں پر مارٹر گولے برسائے جس سے موٹر سائیکل پر جانے والا نوجوان شہید ہو گیا۔ بھارتی فورسز کی فائرنگ سے زخمی ہونے والے دوسرے پانچ زخمی دیہاتیوں کو سی ایم ایچ سیالکوٹ میں طبی امداد دی جا رہی ہے۔ شدید گولہ باری اور فائرنگ کے باوجود بھی سرحدی دیہاتوں میں بسنے والوں کے حوصلے چٹان کی طرع مضبوط ہیں اور وہ پنجاب رینجرز اور پاک فوج کے شانہ بشانہ دشمن کی ہر سازش کو ناکام بنانے کے لیے پرعزم ہیں۔ پنجاب رینجرز نے بھارتی فورسز کی فائرنگ کا منہ توڑ جواب دیا جس کے بعد دشمن کی گنیں خاموش ہو گئیں۔