عوام کے صبر کا پیمانہ لبریز ہوچکا، مزید امتحان نہ لیا جائے، عمران خان
اسلام آباد (92 نیوز) - سربراہ تحریک انصاف عمران خان کا کہنا ہے کہ عوام کے صبر کا پیمانہ لبریز ہوچکا ہے، مزید امتحان نہ لیا جائے۔
وزیراعلیٰ پنجاب کیلئے پی ٹی آئی کی اکثریت کو تکنیکی بنیادوں پر شکست کے خلاف پاکستان تحریک انصاف کا ملک بھر میں احتجاج کا سلسلہ جاری ہے۔
پاکستان تحریک انصاف کے چیئرمین عمران خان کا کہنا ہے کہ قوم سےاپنےروابط اور حقیقی آزادی کی میری پکار پر انکے جواب کے بعد میں کامل یقین سے یہ کہہ سکتاہوں کہ عوامِ پاکستان پہلے ہی بہت کچھ سہہ چکے ہیں چنانچہ اب ان مافیاز کو لوٹ مار کا سلسلہ برقرار رکھنے کی قطعاً اجازت نہیں دینگے۔
قوم سےاپنےروابط+حقیقی آزادی کی میری پکارپرانکے جواب کےبعدمیں کامل یقین سےیہ کہہ سکتاہوں کہ عوامِ پاکستان پہلےہی بہت کچھ سہہ چکےہیں چنانچہ اب ان مافیاز کولوٹ مار کاسلسلہ برقراررکھنےکی قطعاًاجازت نہیں دینگے۔سری لنکاکیطرح ہم اس صورتحال سےزیادہ دورنہیں جب ہمارےلوگ سڑکوں پرامڈ آئینگے۔
— Imran Khan (@ImranKhanPTI) July 23, 2022
اپنے ٹویٹ میں عمران خان نے کہا ہے کہ سری لنکا کی طرح ہم اس صورتحال سے زیادہ دور نہیں جب ہمارے لوگ سڑکوں پر امڈ آئینگے۔30 برسوں سے زائد مدت میں پاکستان کی لوٹ کھسوٹ سے جمع کی گئی اپنی غیرقانونی دولت بچانے کیلئے زرداری و شریف مافیا نے صرف 3 ماہ سے کچھ ہی زائد عرصے میں ملک کو سیاسی و اقتصادی طور پر گھٹنوں کے بل گرا دیا ہے۔
عمران خان نے سوال پوچھا ہے کہ ریاستی ادارے کب تک اس کی اجازت دیتے رہیں گے؟ دوسری طرف عمران خان کی کال پر گزشتہ شب سے ملک کے مختلف علاقوں میں احتجاج کا سلسلہ جاری ہے، پنجاب میں مینڈیٹ چھین جانے پر پی ٹی آئی کے کارکنان میں غم و غصہ ہے۔
