عمران خان نے قومی اسمبلی میں واپسی سائفر کی تحقیقات سے مشروط کردی

اسلام آباد (92 نیوز) - سابق وزیراعظم عمران خان نے قومی اسمبلی میں واپسی سائفر کی تحقیقات سے مشروط کردی۔

چیئرمین پی ٹی آئی نے صحافیوں سے گفتگو میں کہا اگر امریکی خط کی تحقیقات کی جائیں تو اسمبلی واپس آسکتے ہیں، بھارت کی برتری اور اسرائیل کو تسلیم کرنے کی خارجہ پالیسی نہیں ہو سکتی، امریکا کے ساتھ تعلقات ملکی مفاد کے تحت چاہتے ہیں۔

عمران خان نے کہا کہ شہباز شریف کی تقریر ملک کے دیوالیہ ہونے کا اعلان ہے، شہباز شریف اور مفتاح اسماعیل نے ملک کا بیڑہ غرق کر دیا، اب حکومت ملی تو ماضی کی غلطیاں نہیں دہرائیں گے۔

انہوں نے کہا کہ اب ہم 3 سالہ تجربے کے ساتھ حکومت چلانے کی تیاری کرچکے، ہمارے سامنے واضح روڈ میپ ہے عدالتی نظام کو درست کرکے کنٹریکٹ انفورسمنٹ کو یقینی بنائیں گے، اس عمل سے سرمایہ کاری کو تحفظ ملے گا۔ ایف بی آر کی مکمل اصلاح کرکے محصولات بڑھائیں گے۔