ممنوعہ فنڈنگ کیس، عمران خان کی عبوری ضمانت میں 14 دسمبر تک توسیع
اسلام آباد (92 نیوز) - ممنوعہ فنڈنگ کیس میں عمران خان کی عبوری ضمانت میں 14 دسمبر تک توسیع ہو گئی۔
بینکنگ کورٹ اسلام آباد کی جج رخشندہ شاہین نے سابق وزیراعظم عمران خان سمیت دیگر ملزمان کے خلاف ممنوعہ فنڈنگ کیس کی درخواست پر سماعت کی۔ پراسیکیوٹر راجہ رضوان عباسی عدالت میں پیش ہوئے جبکہ دیگر شریک ملزمان سردار اظہر، سید یونس ،حامد زمان، طارق شفیع، سیف اللہ نیازی اور عامر محمود کیانی بھی عدالت میں پیش ہوئے۔
سابق وزیر اعظم عمران خان کے وکیل نعیم پنجوتھا کی جانب سے استثنیٰ کی درخواست دائر کی گئی۔ عمران خان کے وکیل نے عدالت کو بتایا کہ عمران خان پہلے عدالت میں پیش ہوتے رہے ہیں طبعیت کی ناسازی کے باعث پیش نہیں ہو سکے۔ آج کے لئے حاضری سے استثنیٰ دیا جائے۔
بعدازاں عدالت نے عمران خان سمیت دیگر ملزمان کی عبوری ضمانت میں 14 دسمبر تک توسیع کر دی۔
