لاہور کے علاقے گجومتہ میں گھر سے چار افراد کی لاشیں برآمد

لاہور (92 نیوز) لاہور کے علاقے گجومتہ میں گھر سے چار افراد کی لاشیں ملی ہیں۔

42سالہ ڈاکٹر ناہید، اس کے 21 سالہ بیٹے اور سترہ اور پندرہ سال کی 2 بیٹیوں کو گولیاں مار کر موت کے گھاٹ اتارا گیا۔ اہل محلہ کے مطابق مقتولہ گھر میں اپنے بچوں کے ساتھ اکیلی رہتی تھی اور اسی گھر میں کلینک بھی چلاتی تھیں جبکہ اس کے شوہر نے دو شادیاں کر رکھی تھیں۔

ڈاکٹرناہید کا ایک بیٹا عمارت کے نچلے فلور پر سونے کی وجہ سے بچ گیا۔ پانی کی موٹر چلانے کے لئے آنے والے ہمسائے نے گھر میں لاشیں دیکھ کر پولیس کو اطلاع دی۔

پولیس نے موقع پر پہنچ کر شواہد اکٹھے کیے اور لاشیں پوسٹ مارٹم کے لئے جمع کروا دیں۔

وزیراعلی عثمان بزدار نے ایک ہی خاندان کے 4 افراد کے قتل کے واقعہ کا نوٹس لیتے ہوئے سی سی پی او لاہور سے رپورٹ طلب کر لی۔

آئی جی پنجاب اور سی سی پی او نے ایس پی ماڈل ٹاؤن کو فوری ملزم گرفتار کرنے کا حکم دیا ہے۔