آئی سی سی نے ٹی ٹوئنٹی ورلڈکپ 2022 کے شیڈول کا اعلان کر دیا

دبئی (92 نیوز) آئی سی سی نے ٹی ٹوئنٹی ورلڈکپ 2022 کے شیڈول کا اعلان کر دیا۔ پاکستان پہلا میچ بھارت کے خلاف 23 اکتوبرکو کھیلے گا۔

آسٹریلیا کے 7 شہروں میں 16 اکتوبر سے 13 نومبر تک دنیا کی بہترین کرکٹ ٹیمیں آمنے سامنے ہوں گی۔ پاکستان اور بھارت کی ٹیمیں گزشتہ سال کی طرح ایک بار پھر ایک ہی گروپ میں شامل ہیں۔ دونوں ٹیمیں 23 اکتوبر کو میلبرن کرکٹ گراؤنڈ میں ایک دوسرے کے مقابل ہوں گی۔

ایونٹ میں کل 16 ٹیمیں حصہ لیں گی۔ کوالیفائنگ راؤنڈ 16 سے 21 اکتوبر تک کھیلا جائے گا۔ سپر 12راؤنڈ میں ٹیموں کو دو گروپ میں تقسیم کیا گیا ہے۔ گروپ ون میں دفاعی چیمپئن آسڑیلیا، نیوزی لینڈ، انگلینڈ ، افغانستان کے علاوہ کوالیفائنگ راؤنڈ جیتنے والی 2 ٹیمیں شامل ہوں گی۔

گروپ ٹو میں  پاکستان، بھارت، بنگلا دیش اور جنوبی افریقہ کی ٹیمیں شامل ہیں دو ٹیمیں کوالیفائنگ راؤنڈ سے گروپ ٹو کا حصہ بنیں گی ۔

پاکستانی ٹیم 3 نومبر کو جنوبی افریقہ اور 6 نومبر کو بنگلا دیش کے خلاف میچ کھیلے گی۔ ایونٹ کا فائنل 13 نومبر کو میلبرن میں کھیلا جائے گا۔