بھارت میں اقلیتوں کو ہندوتوا گروپ کی طرف سے نشانہ بنایا جارہا ہے، وزیراعظم
اسلام آباد (92 نیوز) وزیراعظم عمران خان کہتے ہیں کہ بی جے پی کے انتہا پسند نظریے کے تحت بھارت میں اقلیتوں کو ہندوتوا گروپ کی طرف سے نشانہ بنایا جارہا ہے۔
عمران خان نے ٹویٹ پیغام میں کہا کہ دسمبر میں ہندوتوا شدت پسندوں کے ایک اجتماع میں بھارت میں اقلیتوں خصوصاً 20 کروڑ مسلمانوں کے قتلِ عام کیلئے دی جانے والی کال پر مودی سرکار کی پیہم خاموشی اس سوال کو جنم دیتی ہے کہ آیا جی جے پی کی حکومت اس پکار کی حامی ہے۔
بھارتیہ جنتا پارٹی کی مودی سرکار کے شدت پسندانہ نظریے کے سائے میں ہندوتوا جتھے پوری ڈھٹائی اور آزادی سے بھارت میں تمام مذہبی اقلیتوں پر حملہ آور ہیں۔ مودی سرکار کے یہ شدت پسندانہ عزائم ہمارے علاقائی امن کیلئے ایک جیتا جاگتا اورحقیقی خطرہ ہیں۔
— Imran Khan (@ImranKhanPTI) January 10, 2022
وزیراعظم کا کہنا تھا کہ مودی سرکار کا انتہا پسندانہ ایجنڈا خطے کے امن کے لیے حقیقی خطرہ ہے۔ وقت کی نزاکت کا تقاضا ہے کہ عالمی برادری اس کا نوٹس لے اور کارروائی کرے۔