اپوزیشن کی کرپشن انہیں متحد کر رہی ہے،عوام انہیں اچھی طرح جانتے ہیں، شاہ محمود

کراچی (92 نیوز) - وزیر خارجہ شاہ محمود قریشی نے کہا ہے کہ اپوزیشن کی کرپشن انہیں متحد کر رہی ہے لیکن عوام ان کی حقیقت جان چکے ہیں۔

اتوار کو حقوق سندھ مارچ سے خطاب کرتے ہوئے انہوں نے کہا کہ میں نے سندھ کے لوگوں کی بے بسی دیکھی ہے، سندھ کا حال دیکھ کر افسوس ہوتا ہے۔ ہمارے دور میں کوئی سیاسی قیدی نہیں۔ ہم نے کسی سیاستدان کو لاپتہ نہیں کیا۔

شاہ محمود قریشی نے کہا کہ جو لوگ ہم خیال ہیں وہ سب اکٹھے ہو رہے ہیں، اس کی وجہ کیا ہے؟ "ان کی بدعنوانی انہیں متحد کر رہی ہے۔"

وزیر خارجہ نے کہا کہ وہ سندھ کے اپنے اتحادیوں کے شکر گزار ہیں، ہم نے اتحادیوں کے مطالبات کو پورا کرنے کے لیے اقدامات کیے ہیں۔ حیدرآباد یونیورسٹی کے لیے قانون سازی کی گئی ہے۔

انہوں نے مزید کہا کہ وزیراعظم عمران خان نے بڑے پیمانے پر بین الاقوامی سرمایہ کاری کا منصوبہ بنایا ہے۔