Sunday, June 26, 2022

امپورٹڈ حکومت مفاد پرستوں کا دوسرا نام ہے، شیخ رشید

امپورٹڈ حکومت مفاد پرستوں کا دوسرا نام ہے، شیخ رشید
June 17, 2022 ویب ڈیسک

اسلام آباد (92 نیوز) - سربراہ عوامی مسلم لیگ شیخ رشید کا کہنا ہے کہ امپورٹڈ حکومت مفاد پرستوں کا دوسرا نام ہے۔

جمعہ کے روز اپنے ٹویٹ میں لکھا کہ یہ چوروں کی بیٹھک سجائی گئی ہے جس کو عوام میں کوئی پذیرائی حاصل نہیں، اتوار کی شام 9 بجے عمران خان کی کال پر لال حویلی میں ان کا خطاب سنیں گے۔

عوامی مسلم لیگ کے سربراہ نے کہا کہ وزیر خزانہ مہنگائی کا چوتھا ٹیکہ لگانے والے ہیں، ڈالر 210 پر اور حوالہ 220 پر آ گیا ہے، جس دن ان کے کیس ختم ہو گئے یہ الیکشن کی طرف جائیں گے۔ ایک درجن جماعتیں عوام کی نظروں سے گر گئی ہیں، اکیلا عمران خان عوام کے دلوں پر چھا گیا ہے، لندن خفیہ معاہدے کے تحت نواز شریف پاکستان نہیں آ رہے۔

شیخ رشید بولے کہ اگر شام سات بجے مارکیٹیں اور دکانیں بند کی گئیں تو دکاندار بھی بھوکے مریں گے، معاشی تباہی کا سہرا امپورٹڈ حکومت کے سر جاتا ہے، امریکن ایمبیسڈر آ چکا ہے اور چائینہ کا ایمبیسڈر جا چکا ہے، ہندوستان میں مسلمانوں کے گھر گرائے جا رہے ہیں اور امپورٹڈ حکومت ہندوستان سے تجارت کرنے جا رہی ہے۔