مولانا فضل الرحمان اور مسلم لیگ فنکشنل کے محمد علی درانی میں ملاقات، سیاسی صورتحال پر گفتگو
لاہور ( 92 نیوز) مولانا فضل الرحمان سے مسلم لیگ فنکشنل کے محمد علی درانی نے ملاقات کی ، ملاقات میں ملک کی سیاسی صورتحال پر تفصیلی تبادلہ خیال کیا گیا۔
ملاقات کے بعد دونوں رہنماؤں نے میڈیا سے گفتگو کی ۔ مولانا فضل الرحمان نے کہا کہ محمد علی درانی کی سوچ کو مثبت کہا جا سکتا ہے ، ہمارا ایک واضح موقف ہے کہ یہ حکومت عوام کی نمائندہ حکومت نہیں ، اس جعلی حکومت کے ہوتے ہوئے مذاکرات نہیں ہو سکتے ، جو قابل عمل بات ہوگی اس پر عمل کیا جائے گا۔
مولانا فضل الرحمان نے کہا کہ تمام ممبران کے اپنی اپنی پارٹیوں کے پاس استعفے پہنچ چکے ہیں ، ہم پہلے سے بہت مضبوط ہو چکے ہیں ، کل اجلاس میں پیپلزپارٹی کی تجاویز سامنے آجائینگی ، کسی ایک فرد کے فیصلے کو نہیں دیکھا جاتا۔
محمد علی درانی نے کہا کہ پیر پگارا کا پیغام لے کر آیا تھا ، اس وقت جو ملک کے حالت ہیں اس پر تفصیلی بات ہوئی ، ملک کو ٹکراؤ سے بچانے کیلئے نئے راستے بنانے چاہئیں ، مولانا سے ملاقات بہت مفید رہی ، آج کی ملاقات کے بعد آگے بہت سے راستے نکلیں گے ۔
محمد علی درانی کا کہنا تھا کہ 2021 کا سال اچھی شروعات لے کر آئے گا ، اختلاف آگے روشن اتفاق میں بدلے گا ، گرینڈ ڈائیلاگ سے پہلے ایجنڈ اسیٹنگ ضروری ہے ۔
صحافی کے بلاول بھٹو سے بھی ملاقات سے متعلق سوال کے جواب میں محمد علی درانی کا کہنا تھا کہ ملاقات کا کوئی شیڈول نہیں ، ٹریک ٹو ڈائیلاگ میں ملاقات شیڈول نہیں ہوتی ۔